دافغان شخصيتونود راستنېدو د کميسيون چارې څومره اغېزناکې دي؟  

الهام الدين افغان 

تېر کال طالبانو ، له افغان شخصيتونو سره د اړيکو په نوم کميسيون جوړ کړ چې د طالبانو په وينا دغه کمیسيون له هغو افغانانو سره اړيکه نیسي چې د تېر جمهوري نظام  تر چپه کېدو وروسته له افغانستان نه وتلي دي .

ددغه کمیسيون وياند احمد وثيق رسنيو ته ويلي چې ددغه کميسيون غړو  ، د را ستنيدونکو شخصيتونو لپاره يو طرزالعمل جوړ کړی چې دغه طرزالعمل د لیدنې کتنې، حقوقي شخړې، د پانګونې ستونزې او د ځینو وسایلو کارول مشخصوي.

 د وثيق په وينا یوه کړنلاره يې هم جوړه کړې ، چې  راستنيدونکي شخصيتونه  وکولی شي یو سند ترلاسه کړي چې په اساس یې په خپل هیواد کې خوندي ژوند وکړي.” د هغوی لپاره هم یوه کړنلاره جوړه شوې او وروستۍ شوې ده . ددې کميسيون د اړيکو پر مټ تر اوسه لسګونه کسان راستانه  شوي دي  ، د کمیسیون دچارواکو په وينا د راستنو شويو شمېر شا اوخوا پنځوسوو ته رسيېږي  . 
وثیق رسنيو ته ويلي (( له افغان شخصیتونو سره دتماس کمیسیون اړیکو څانګه فعاله ده او څلورویشت ساعته دټولو خلکو په خدمت کې ده او هغوی کولی شي چې له دغې څانګې  سره تماس ونیسي او هغه فورمې چې ددوي شخصي احوالو دثبت لپاره ورکول کیږي ترلاسه او ډکې کړي او وروسته ددوي د راتګ لپاره زمینه برابرېږي  له ټولو هغو افغانانو څخه چې دمنفي تبلیغاتو له امله له هیواده وتلي هیله مو داده چې باید خپل وطن ته راستانه شي.))

له افغان شخصیتونو سره د تماس کمیسیون ویاند احمدالله وثیق وایي، چې هېواد ته راستنې شوې سیاسي څېرې له بشپړ خوندېتوب نه برخمنې دي او دوسیې  یې د دغه کمېسیون له لوري څېړل کېږي . خو ځينې افغانان بیا له افغان شخصيتونو سره داړيکو په نوم کمیسيون جوړول تېر اېستونکي اقدام بولي . 

(( د احسان الله نېرو په نوم  بهرمېشتی افغان چې ځان د افغانستان د ژغورنې په نوم د مقاومت دعالي شورا وياند بولي له   ددغه ډول کمېسیون جوړول پایله نلري. د افغانستان مسایل په دې کچه یو کمېسیون نه‌شي حلولی. موږ د پراخ‌ بنسټه حکومت، د ښځو حقونو، بیان ازادۍ او د نظام څرنګوالي په اړه د خبرو غوښتونکي یو چې دغه کمېسیون د دې مسایلو پر وړاندې د خبرو لپاره کوچنی دی))  .

د سياسي چارو يو کار پوه روان فرهادي چې له رسنيو سره غږېدلی دا کميسيون  له طالبانو سره د بېعت په توګه بولي چې په وينا یې هيڅ اغېز نلري .

پر يو شمېر معلومو څېرو او مشهورو شخصيتونو سربېره  ځينې دا سې خلکو هم دې کمیسيون سره اړيکې نيولي او ددغه کمیسيون کارتونه يې تر لاسه کړي چې نه يې لوړ دولتي موقفونه لرل او نه هم مشهور خلک وو ، خو دوی يواځې ددې په موخه چې د وسلې اخیستلو امتياز تر لاسه کړي او يا د خونديتوب کارتونه چې ورکول کېږي  ترې ګټه واخلي چې که څوک ورسره حقوقي دعوې لري چې د همدغه کمېسيون پر مټ يې هوارې کړي . 

الهام الدین افغان (مستعار) په افغانستان کې د پوهنتون استاد دی.

 یادونه: د مقالې محتوا یوازې د لیکوال مسؤلیت دی. د افغان دیاسپورا شبکه به په مقالو کې د هر ډول ناسم یا غلط بیان مسؤلیت په غاړه  نه اخلي.